Bydd y newid i ddyfodol sy'n cael ei bweru gan ynni adnewyddadwy yn gofyn am ddibyniaeth gynyddol ar dechnoleg storio ynni. Mae ffynonellau ynni adnewyddadwy, megis solar a gwynt, yn dibynnu ar y tywydd, ond trwy storio ynni gormodol a gynhyrchir yn ystod cyfnodau heulog neu wyntog, gall system storio ynni batri gefnogi allbwn ynni adnewyddadwy mwy cyson a chynaliadwy.

Mae trydan yn cael ei ddefnyddio mewn amser real a bydd y dechnoleg hon, lle bo modd, yn galluogi cartrefi a busnesau i gael eu pweru gan ynni adnewyddadwy - hyd yn oed pan nad yw'r haul yn tywynnu, neu pan nad yw'r gwynt yn chwythu.

Mae technoleg storio ynni batri yn helpu i wella sefydlogrwydd grid, gan lyfnhau amrywioldeb ffynonellau ynni adnewyddadwy trwy ddarparu ymateb cyflym i newidiadau sydyn mewn galw neu gynhyrchu.

Mae gan Ganolfan Sero Net Penfro ran hollbwysig i'w chwarae ar lwybr Cymru a'r DU i Sero Net. Drwy ddatgarboneiddio ei weithrediadau presennol yng Ngorsaf Bŵer Penfro, wrth fuddsoddi mewn technolegau arloesol newydd, megis storio ynni batri a chynhyrchu hydrogen, gall RWE osod Penfro ar flaen y gad o ran dyfodol carbon isel De Cymru.

Gyda’i gilydd bydd y technolegau newydd hyn yn rhan o, ac yn cyfrannu at, weledigaeth RWE ar gyfer Canolfan Sero Net Penfro – hyb arloesi carbon isel a chynhyrchu ynni glân a fydd yn helpu i ddatgarboneiddio’r sector ynni yng Nghymru am genedlaethau i ddod.